Makronu Hitlerə bənzədən karikaturaçıya cinayət işi açılıb
Makronu Hitlerə bənzədən karikaturaçıya cinayət işi açılıb
Fransa prezidenti Emmanuel Makronun Adolf Hitler obrazında təsvir olunduğu fotolarının yayılması ilə bağlı cinayət işi açılıb.
Xəbər verilir ki, cinayət işi Tulon şəhər prokurorluğu tərəfindən başladılıb.
Məlumata görə, çərşənbə axşamı günü Tulon şəhərində və La Sen-sur-Mer kommunasında fotomontajlı plakatlar ortaya çıxıb. Həmin plakatlarda Makron Hitler obrazında təsvir edilib, yanında qırmızı fonda ağ hərflərlə: "İtaət et", "Peyvəndlən" yazılıb. Həmçinin, fotoda Makronun partiyasının qısaldılmış adı – LREM ("İrəli, Respublika!") – yer alıb.
Reklam lövhələrində yerləşdirilən fotoların müəllifi böhtan atmaqda ittiham olunur.
Keçən həftə sonu reklam lövhələrindən birində qara rəngdə böyük hərflərlə "Utanc" sözü yazılıb. Bunun müəllifinin karikaturaçı, aktivist Mişel-Anj Flor olduğu bildirilir. O, Fransada sanitar keçidlərin tətbiqinə və səhiyyə işçiləri üçün məcburi peyvəndlənməyə qarşı münasibətini bu şəkildə ifadə edib.
Xatırladaq ki, keçən şənbə Paris də daxil olmaqla, Fransanın bir sıra şəhərlərində sanitar keçid tətbiqinin genişləndirilməsinə və tibb işçilərinin məcburi peyvənd olunmasına etiraz edilib.
Azadsoz.com
