Niderlanddan ABŞ-yə uçan təyyarə sərnişinlərin üzərinə qurdlar töküldüyü üçün Amsterdama qayıtmalı olub.

Xəbər verilir ki, çərşənbə axşamı səhər Amsterdamdan Detroyta doğru havaya qalxan təyyarədə bir müddət sonra ekonom sinif sərnişinlərinin yerləşdiyi hissədəki şkafdan qurdlar düşməyə başlayıb.

Sərnişinlər kabin heyətinə zəng edərək vəziyyəti izah ediblər. 

Müəyyən edilib ki, qurdlar yuxarıdakı şkafdakı çamadandan düşüb. Sözügedən çamadanda çürük balıq olub.

Kabin heyətinin xəbərdarlığından sonra təyyarə havaya qalxdıqdan təxminən 1 saat sonra Amsterdamın Şiphol hava limanına qayıdıb.

Təyyarənin geri dönməsinə səbəb olan çantanın sahibi də müəyyən edilib və bu sərnişin başqa yerə aparılıb. Sərnişinin yenidən uçuşa icazə verilib-verilmədiyi açıqlanmayıb.

İngiltərədə nəşr olunan “The Independent” qəzetinə danışan Delta Airlines rəsmiləri hadisəyə görə üzr istəyib.

Aviaşirkətdən verilən məlumata görə, 133 saylı reysin reysi “əl yükünün düzgün qablaşdırılmaması səbəbindən” dayandırılıb və sərnişinlər növbəti reysə keçirilib.

Hadisənin şahidi olan şəxslərin sosial mediada paylaşdığı məlumatlara görə, aviaşirkət sərnişinlərə 8 min uçuş mili, otel otağında qalma xərcləri və 30 dollar yemək haqqı ödəyib.

Qeyd edək ki, təyyarə lazımi təmizləmə üçün istismardan çıxarılıb.

Azadsoz.com