59 nömrəli tam orta məktəbin direktoru Əhmədova Pikə və ailəsinin qətli ilə bağlı Baş Prokurorluqdan və Bakı Şəhəri üzrə Təhsil İdarəsindən rəsmi məlumat verilib.

“BŞTİ-nin kollektivi məktəb direktorunun faciəli vəfatından kədərləndiyini bildirir, mərhumun doğmalarına və məktəbin müəllim-şagird kollektivinə dərin hüznlə başsağlığı verir”, - deyə BŞTİ-dən bildirilib.

Baş Prokurorluqdan isə vurğulanıb:

“3 nəfər ailə üzvünü qəsdən öldürməkdə şübhəli bilinən şəxs tutulub

Fevralın 13-də saat 16 radələrində paytaxtın Xətai rayonu ərazisində 3 nəfərin öldürülməsi barədə rayon prokurorluğuna məlumat daxil olub.
Araşdırma zamanı 1999-cu il təvəllüdlü Əhməd Əhmədovun aralarında yaranmış mübahisə zamanı atası 1972-ci il təvəllüdlü Mehman Əhmədova, anası 1977-ci il təvəllüdlü Bikə Əhmədovaya və 2015-ci il təvəllüdlü azyaşlı qardaşına balta ilə xəsarətlər yetirərək onları qəsdən öldürməsinə əsaslı şübhələr müəyyən edilib.

Faktla bağlı Xətai rayon prokurorluğunda Cinayət Məcəlləsinin 120.2.4 (xüsusi amansızlıqla qəsdən adam öldürmə) və 120.2.7-ci (iki və ya daha çox şəxsi öldürmə) maddələrilə cinayət işi başlanıb, Əhməd Əhmədov prokurorluğun qərarı ilə iş üzrə şübhəli şəxs qismində tutulub.

Hazırda ibtidai istintaq davam edir”.

Azadsoz.com