Son günlərdə SOCAR-ın ümumi məsələlər üzrə vitse-prezidenti Mikayıl İsmayılovun adı bir sıra qalmaqallarda hallanır. 

İlk olaraq ondan başlayaq ki, Mikayıl İsmayılov rəhbərliyində təmsil olunduğu şirkətin “qara kassası” hesab olunur. Kifayət qədər gücə və maliyyə imkanlarına sahib olan Mikayıl İsmayılov SOCAR-ın qaranlıq əməliyyatlarında bütün maliyyə prosesini idarə olunmasına nəzarət edir. 

Vitse-prezident bu gücü və maliyyə imkanlarını isə fərqli yollarla əldə edib. O, SOCAR-ın balansında olan bütün avtomobilləri özünə məxsus yağ firmalarının məhsulları ilə təmin edir. Belə ki, şirkətin balansında olan bütün bu avtomobillərə göstərilən texniki xidmət zamanı “Repsol”, “Dew”, “Ekcellent”, “Maqnium” markalı motor yağlarından istifadə edilməlidir.

Babək prospektində yerləşən “General Motors Company” avtomobillərinin satışı ilə məşğul olan “GM” avtosalonunun sahibdir. Böyük ərazini əhatə edən avtosalonun əsas gəliri SOCAR-a avtomobil satışı və şirkət avtomobillərinə göstərilən servisdir. Məhz bu xidmətlər müqabilində avtosalon və şirkətlərin SOCAR-la aylıq 2 mln. manatlıq müqaviləsi mövcuddur. SOCAR-ın orta və yüksək vəzifəli şəxsləri həmin avtosalondan alınmış “Cadillac”, “Chevrolet” və “Chevrolet pickup”, “Buick” markalı bahalı xidməti maşınlarla təmin olunub. 

Mikayıl İsmayılovun birbaşa adının hallanmadığı bir çox şirkətlər də mövcuddur. Bütün satınalma qaydalarını pozaraq SOCAR-ın podratçı şirkətlərinə çevrilən bu şirkətlərdən biri “Olerni LTD” şirkətidir. Şirkətin təsisçisi Akif İmanov adlı şəxs olmasına baxmayaraq bütün haqları Mikayıl İsmayılova məxsusdur. SOCAR-ın əsas təchizatçılarından olan şirkətin fəaliyyəti kranların, neft-qaz separatorların, yanğın təhlükəsizliyi sisteminə aid olan köpükqarışdırıcıların istehsalı texniki xidməti və təmirini həyata keçirməkdən ibarətdir. 

Həmçinin təchizat sahəsində formal rəqabət yaratmaq üçün Mikayıl İsmayılova məxus olan bir digər şirkət “Kapital Motors” da oxşar xidmətləri göstərir.

Mikayıl İsmayılovun biznes imperiyası

Mikayıl İsmayılov “Modern Group”-a daxil olan şirkətlərin hamısı, o cümlədən “Az Granata”, geyim firması “Alyans Tekstil”, "Modern Hospital", avtomibil satışı ilə məşğul olan “Great Motors”, eManat brendi ilə tanınan “Modenis” MMC, təbii və mineral süfrə suyu istehsal edən “Mineral Sular” MMC və digər obyektlərin sahibidir. 
Onun tapşırğı ilə “Modern groupa” daxil olan “Az Granata” şirkətinin Ağsudakı zavodunun inşası zamanı bir çox insanın torpaqlarına əlindən alınıb. Ağsu və İsmayıllı şəhərləri arasındakı ərazidə yeni torpaq sahələri ələ keçirilərək burada üzümlüklər salınıb.

“Modern Group”-a tabe olan adı “Şamaxı Palace” olaraq dəyişdirilən “Şamaxı Rixos” otel və “Şərədil” istirahət mərkəzi isə Mikayıl İsmayılovun ümumi büdcəyə xəyanəti nəticəsində əlindən alınıb.

Belə ki, Mikayıl İsmayılova məxsus olan və Nizami rayonu, Mikayıl Əliyev prospektində yerləşən iki blok və beş mərtəbədən ibarət olan obyekt neft şirkətində işləyən xarici vətəndaşların burda yaşaması üçün nəzərdə tutulub. Obyektin dəyəri 5 mln. ABŞ dolları olaraq qiymətləndirilir.

Eyni zamanda Bakıda bir sıra ticarət obyektləri, villalar, 200-dən çox mənzil, paytaxtın mərkəzində yerləşən “Central Baku” və “Özsüt” restoranlarının da Mikayıl İsmayılova məxus olduğu, qardaşının adına isə Fəvvarələr Meydanı ərazisində çoxsaylı daşınmaz əmlakın olduğu bildirilir.  

Türkan qəsəbəsində 3 hektarlıq ərazidə, ailə üzvləri üçün 5 imarət ucaldan SOCAR-ın vitse-prezidenti imarətlərin hər birinə milyonlarla manat xərcləməklə yanaşı, dənizin bir hissəsini də həyətinə əlavə edib. Villada həm yaxtalar üçün liman, həm tennis meydançası və hovuz da mövcuddur. Villa Mikayıl İsmayılovun oğlu Orxan İsmayılzadənin adına rəsmiləşdirilb.

Validə Abbasova ilə şəxsi münasibətləri

Böyük nüfuza və maliyyə imkanlarına sahib bir çox məmur kimi Mikayıl İsmayılov da şəxsi həyatını rəngarəng etməkdən geri qalmır. Məlumatlara görə, SOCAR-ın vitse-prezidenti son dövrlərdə Avropada yaşayan məşhur model Validə Abbasovaya aşiqdir. 

Validə Abbasovanın son dövrlərdə sosial şəbəkə hesablarında paylaşdığı lüks həyat yaşamasının təminatçısı da məhz Mikayıl İsmayılovdur. Məlumatlara görə, model xanıma özəl təyyarə ilə uçuşlar təmin edən SOCAR-ın vitse-prezidenti ilə tanışlıq üçün digər modellər arasında ciddi rəqabət mövcuddur. 

SOCAR-ın vitse-prezidenti uzun müddətdir ki, ATV telekanalında aparıcı kimi fəaliyyət göstərən Nanə Ağamalıyeva ilə şəxsi münasibətdə olması ilə bağlı məlumatlar da mövcuddur. Hətta cütlüyün bu münasibətdən bir övladı da dünyaya gəlib və hazırda Türkiyədə yaşayır. 2020-ci ildə pandemiya şəraiti ilə əlaqədar Nanə Ağamalıyevaya diqqət ayıra bilməyən Mikayıl İsmayılov  xanım aparıcının könlünü almaq üçün ona “Porşe” markalı avtomobil hədiyyə edib.

Poeziya və ritorika həvəskarı olması Mikayıl İsmayılovun Nanə Ağamalıyeva və Validə Abbasova kimi xanımlara qarşı meylinin əsas səbəbləridir.  

Kəmaləddin Heydərovla rəqabət

Özünü hər zaman fövqəlnazir Kəmaləddin Heydərovla rəqabətdə görən Mikayıl İsmayılov bank və maliyyə ödənişləri sahəsində rəqibinin fəaliyyətinə əngəl olmağa çalışıb. Belə ki, RabitəBankın 50% payçısı olan Mikayıl İsmayılov “MilliÖn” ödəmə sisteminə qarşı “eManat”ı yaradıb. Qeyd edək ki, “AFB” və “Bank of Baku” kimi “MilliÖn” ödəmə sistemi də Kəmaləddin Heydərova məxsusdur və keçmiş deputat Hacı Salayev tərəfindən idarə olunur. 

Mikayıl İsmayılov Kəmaləddin Heydərova məxsus “Jalə” şirələrinə rəqib olaraq “Az Granata” şirkətini yaradıb. Bu rəqabət prinsipial yanaşan Mikayıl İsmayılov, “Jalə”-nin texnoloqlarına daha yüksək məvacib təklif edərək öz şirkətinə cəlb edib.

Bir müddət əvvəl yanğınlarla gündəmə gələn və Bakının Binəqədi rayonu ərazisində yerləşən "Eurohome" tikinti malları bazarının da Mikayıl İsmayılova aid olduğu bildirilir. Qeyd edək ki, bir müddət əvvəl “EuroHome” tikinti materialları bazarının bilinən direktoru Samir Məmmədov həbs olunub. Amma Mikayıl İsmayılovun adı isə bu prosesdə çəkilməyib, ancaq ehtimal olunur ki, yaxın zamanlarda bu məsələ ilə bağlı yenidən gündəmə gələcək.
 

Azadsoz.com

• Teqlər:
• Mikayılİsmayılov
• SOCAR
• Kəmaləddin