Bu gün paytaxtın Nərimanov rayonu, Ziya Bünyadov prospektində yerləşən tikinti materiallarının satışı mağazasında yanğın baş verib.

Bu barədə Azərbaycan Dövlət Neft Şirkətinin (SOCAR) “Azəriqaz” İstehsalat Birliyindən məlumat verilib.

Bakı Regional Qaz İstismarı Departamentinin rəisi Rauf Əhmədov hadisə haqqında bildirib ki, yanğın nəticəsində obyektdə 2 nəfər xəsarət alıb və tibbi müayinədən keçirilməsi üçün xəstəxanaya yerləşdiriliblər.

Onun sözlərinə görə, hazırda hadisənin baş vermə səbəbləri ilə əlaqədar yerində araşdırma aparılır: “Obyektin qaz təsərrüfatı və yaxınlığından keçən kommunikasiya xətlərində təsbit işləri görülür”.

Departament rəisi qeyd edib ki, “Azəriqaz”ın əməkdaşları tərəfindən hadisə yerində müvafiq tədbirlər görülməkdədir.

Azadsoz.com