Rusiya “Sasna Srer”-ə qadağa qoyulmasını və liderlərinin dərhal həbsini tələb etməlidir. Bu şəxslər faktiki olaraq Rusiya səfirliyinə qarşı terror aktı hazırladıqlarını etiraf edirlər. Ona görə də bizim Ermənistan hökumətindən sərt tədbirlər tələb etmək haqqımız var.

Bunu Siyasi Araşdırmalar İnstitutunun direktoru Sergey Markov Şuşa yaxınlığında dünən baş vermiş terror aktını şərh edərkən deyib.

O, Qarabağda Azərbaycanın müvəqqəti nəzarətində olmayan ərazilərdə silahların və hərbiləşdirilmiş dəstələrin olmasını böyük problem adlandırıb.

“Rusiya sülhməramlılarının antiterror əməliyyatı keçirmək mandatı yoxdur. Bu, sazişi imzalayan digər ölkələr - Azərbaycan və Ermənistanla razılaşdırılmalıdır. Sülhməramlıların silahdan yalnız iki halda istifadə etmək hüququ var: Canlarını qorumaq və mülki vətəndaşları qorumaq üçün.

Fikrimcə, sülhməramlılar silahların yığılması üçün hansısa əməliyyatlar aparmalıdırlar. Amma bunun üçün mandatlarını genişləndirməlidirlər. Bu, növbəti danışıqların mövzusu olacaq. Problemi həll etmək lazımdır.

Qarabağın Azərbaycanın nəzarətində olmayan ərazilərində müxtəlif dərəcədə Ermənistan silahlı qüvvələrinə bağlı olan hərbiləşdirilmiş qruplar sərbəst fəaliyyət göstərir. Həmin qüvvələr təhlükəsiz şəkildə terror hücumlarını hazırlaya bilir və bu, böyük problemdir. Əgər vəziyyət həll olunmasa, bu o deməkdir ki, Azərbaycan tərəfi belə bir əməliyyatı özü, o cümlədən, gördüyümüz kimi, hansısa silahların daşınması üçün istifadə olunan Laçın dəhlizində həyata keçirmək hüququ əldə edir”, - deyə politoloq bildirib.

Azadsoz.com