Fransanın “Pari Sen-Jermen” (PSJ) futbol klubu avqustun 10-da Argentina yığmasının hücumçusu, İspaniyanın “Barselona” komandasından ayrılan Lionel Messinin təqdimat mərasimi üçün Eyfel qülləsini icarəyə götürüb.

Xəbər verilir ki, bu barədə “Football Transfers” məlumat yayıb.

Qeyd edilir ki, Parisin əsas görməli yeri artıq 2017-ci ildə Neymarın “Barselona”dan Fransa klubuna keçidi zamanı təqdimatı üçün istifadə olunub. Məlumata görə, avqustun 10-da PSJ Eyfel qülləsində Lionel Messini təqdim edəcək.

Bu arada məlum olub ki, Londonun “Tottenhem” klubu da Lionel Messi ilə müqavilə üçün daha bir iddiaçı olub. Bu barədə isə “Daily Express” bildirib. Mənbənin iddiasına görə, komanda hücumçu uğrunda PSJ ilə mübarizə aparacaq.

Qeyd edək ki, Argentina millisinin futbolçusu bir neçə gün əvvəl “Barselona” ilə yollarını ayırıb. Klub İspaniya çempionatının maliyyə qaydalarına görə 34 yaşlı futbolçu ilə yeni müqavilə bağlaya bilməyib.

Messi 2003-cü ildən “Barselona”da çıxış edib. O, bu koman6danın heyətində 10 dəfə İspaniya çempionu olub, 7 dəfə ölkə kubokunu, 8 dəfə isə Super Kuboku qazanıb. Dörd dəfə Çempionlar Liqasının qalibi olan təcrübəli hücumçu 3 dəfə UEFA Super Kubokunda və klublararası dünya çempionatında qələbə sevinci yaşayıb.

Messi ötən mövsüm İspaniya La Liqasında 35 matçda iştirak edərək, 30 qol vurub və 11 məhsuldar ötürmə edib. Onun hesabında Çempionlar Liqasının 6 oyununda 5 qol və 2 məhsuldar ötürmə var.

Azadsoz.com

• Teqlər:
• Barselona
• Fransa
• futbol