Polşa və Ukrayna arasında münasibətlər pisləşib
Polşa və Ukrayna arasında münasibətlər pisləşib
Polşa xarici işlər nazirinin müavini Pavel Yablonski iki ölkə nümayəndələrinin qarşılıqlı bəyanatlarından sonra yaranmış diplomatik qalmaqal fonunda Varşava və Kiyev arasında münasibətlərin pisləşdiyini açıqlayıb.
Xəbər verilir ki, iyulun 31-də Polşa Prezident Aparatının rəhbəri Marçin Pşidaç Kiyevin Varşavanın köməyinə görə nankorluq etdiyini bildirdikdən sonra Polşa səfiri Ukrayna Xarici İşlər Nazirliyinə çağırılıb.
Ukraynanın “Европейская правда” nəşrinin yazdığına görə, Pşidaç Polşa mətbuatına müsahibəsində Kiyevin Varşavadan böyük dəstək aldığını və Ukraynanın Polşanın son aylarda və illərdə Ukrayna üçün oynadığı rolu qiymətləndirməyə başlamalı olduğunu bildirib.
Polşa Xarici İşlər Nazirliyi daha sonra məlumat verib ki, Ukrayna səfiri vəzifəsini icra edən şəxs, öz növbəsində, Ukrayna hakimiyyətinin bəyanatlarına görə Polşa Xarici İşlər Nazirliyinə çağırılıb.
“Söhbət, həmişə olduğu kimi, səmimi və obyektiv olacaq. Münasibətlərimizin bu gün necə olması ilə bağlı öz qiymətləndirməmizi təqdim edəcəyik və təəssüf ki, son vaxtlar Ukrayna hakimiyyətinin bir neçə nümayəndəsinin bəyanatlarına görə bu, ən yaxşısı deyil. Bunu heç kim gizlətmir. Bu onunla bağlıdır ki, təəssüf ki, orada (Ukraynada) bəzi emosiyalar üzə çıxıb. Biz bunu başa düşürük, amma siz müttəfiqlərinizi belə mühakimə edə bilməzsiniz”, – deyə Yablonski bildirib.
“Elə məsələlər var ki, biz qarşılıqlı anlaşmaya nail ola bilməmişik. Milli maraq siyasətini rəhbər tuturuq. Yalnız o dərəcədə kömək edirik ki, bu, bizim milli maraqlarımıza uyğun olsun”, – deyə o əlavə edib.
Azadsoz.com
